“Neftin qiyməti aşağı düşməyə başlayan kimi istehlak qiymətləri də
aşağı düşməyə başlayıb. İndi də bu, Azərbaycanda reallıqdır. Biz
istehlak bazarına daha ciddi nəzarət etməliyik, elə etməliyik ki, süni
qiymət şişirtmələri olmasın. Qiymətlərin aşağı düşməsi daha da sürətlə
getməlidir. Həm ərzaq məhsullarının, həm tikinti materiallarının
qiymətləri daha da aşağı düşməlidir və bunu etmək üçün əlbəttə ki,
bütün bu sahəyə ciddi nəzarət olmalıdır”. Prezident İlham Əliyev
bunu srağagün Nazirlər Kabinetinin 2008-ci ildə sosial-iqtisadi
inkişafın yekunlarına həsr olunmuş iclasında deyib. Dövlət başçısı
antiinhisar fəaliyyətini gücləndirməyi vacib sayıb: “Əsassız
inhisarçılığa, qeyri-sağlam rəqabətə son qoyulmalıdır. Bu işlərlə
məşğul olan tərəflər ciddi şəkildə cəzalandırılmalıdır ki, bu sahədə
ciddi dönüş yaradaq. Bu sahədə maksimum şəffaflıq olmalıdır, dövlət
qurumları tərəfindən bütün qanunsuz tələblər, xoşagəlməz hallar,
qanunsuz müdaxilələr dərhal dayandırılmalıdır. Bu qanunsuz işlərlə
məşğul olanlar cinayət məsuliyyətinə cəlb olunmalıdır. Artıq olunur və
daha geniş və daha ciddi şəkildə olunmalıdır. Hamı bilməlidir ki,
dövlət əleyhinə fəaliyyət göstərməyə, əsassız iddiada olmağa, yaxud da
ki, qanunsuz yolla varlanmağa heç kimə icazə verilmir. Buna görə həm
nəzarət, həm də inzibati tədbirlər və ciddi cəza tədbirləri tətbiq
olunmalıdır. Xüsusilə 2009-cu ildə və ondan sonrakı illərdə bu siyasət
davam etdiriləcək”.
